古早,有一個所在,
有一個人不止怠惰,
每日倒在眠床睏,攏不愛起來,
尚連要食飯,嘴亦不愛震動,就如此續餓死.

一死去,閻羅王就召伊去,與伊講:
"汝前世不止怠惰,
今要罰汝去出世做貓."

怠惰的就講:
"卻亦是無要緊,
總是求汝,汝著給我出世,全身軀
攏烏烏的,
孤孤鼻頭留一點白就好."

閻羅王就問伊講:
"彼是怎樣,汝是愛出世如此?"

彼個怠惰的即講:
"若給我出世如此,
我就不時避在彼暗暗的所在,
尚彼鳥鼠看見我的鼻頭
一點白白,
伊不知,拿做叫是些米在得,
就能倚來要食,
彼時候,我嘴一下開,
就如此與伊吞落去,攏免費氣了."